कटहरी गाउँपालिका वडा नं. १ को कार्यालय परिसरमा नव निर्मित भवनमा आदर्श कटहरी सामुदायिक सिकाइ केन्द्रको उद्घाटन भव्य रूपमा सम्पन्न भयो। गाउँपालिका अध्यक्ष देवराज चौधरीले केन्द्रको उद्घाटन गर्दै दमदार रूपमा आफ्नो धारणा राख्नुभयो।
उहाँले भन्नुभयो, “यो सिकाइ केन्द्रले केवल शिक्षा प्रदान गर्ने काम मात्र गर्दैन, यो समुदायको वास्तविक शक्ति र परिवर्तनको माध्यम बन्नेछ। यसले बालविवाह, हिंसा र अन्य कुरीतिहरूको अन्त्य गर्न सक्ने सामर्थ्य राख्छ। शिक्षित नागरिक भनेको आत्मनिर्भर र सचेत नागरिक हो। यो केन्द्रबाट सिकेर हाम्रा नागरिकहरू आफ्नो जीवनस्तर उठाउन सक्षम हुनेछन्।”
उहाँले थप गर्नुभयो, “हामी केवल शिक्षामा सीमित छैनौं, यो केन्द्रले सीप विकास र आर्थिक सशक्तीकरणमा पनि काम गर्नेछ। समुदायका हरेक व्यक्ति सशक्त भएपछि मात्र समृद्ध गाउँको परिकल्पना साकार हुनेछ।”
कार्यक्रममा गाउँपालिकाका प्रमुख प्रशासकीय अधिकृत तेजेन्द्र गौतम, वडा नं. १ का वडा अध्यक्ष हरी राजवंशी, र अन्य स्थानीय जनप्रतिनिधिहरूको उपस्थिति थियो।
शिक्षा शाखा प्रमुख द्रोन प्रसाद पोखरेलले जानकारी दिनुहुँदै, यो केन्द्र २०६६ सालमा जिल्ला शिक्षा कार्यालय अन्तर्गत दर्ता भएको र समुदायको हितका लागि काम गर्दै आएको उल्लेख गर्नुभयो।
अध्यक्ष चौधरीको प्रेरणादायी भनाइले उपस्थित सबैलाई उत्साहित बनाएको थियो। यस केन्द्रले समुदायमा शिक्षाको प्रसार, सीप विकास, र सामाजिक चेतनाको अभिवृद्धिमा नयाँ आयाम थप्ने विश्वास गरिएको छ।
