जहदा गाउँपालिकाको शिक्षा समितिमा विशेष क्षमताका व्यक्तिलाई सदस्य पदमा मनोनयन गरिएको खबरले सकारात्मक चर्चा पाएको छ। गाउँपालिकाका अध्यक्ष जितेन्द्र प्रसाद साहले विशेष क्षमता भएका जयरामपुर, वडा नं. ३ निवासी शम्भु राजवंशीलाई शिक्षा समितिमा सदस्य पदमा मनोनयन गरेपछि यो निर्णयले सबैको ध्यान खिचेको छ।
१३ सदस्यीय समितिमा गाउँपालिकाका प्रशासकीय अधिकृत, शिक्षण महासङ्घका अध्यक्ष लगायत अन्य प्रतिष्ठित व्यक्तित्वहरु छन्। यसरी शम्भु राजवंशीलाई मनोनयन गर्नुले समावेशीकरण र समान अवसरको उदाहरण प्रस्तुत गरेको छ। विशेष क्षमता भएका व्यक्तिलाई यस किसिमको जिम्मेवारी दिनु गाउँपालिकाको शिक्षा र सामुदायिक विकासप्रतिको प्रतिबद्धताको प्रतीक मानिएको छ।शम्भु राजवंशीले आफूलाई शिक्षा समितिको बैठकमा सहभागी हुन पाउँदा खुसी व्यक्त गरेका छन्। उनले भने, "यो मेरो लागि ठूलो अवसर हो। म गाउँपालिकाको शिक्षा क्षेत्र सुधार गर्न सकेसम्म योगदान दिनेछु।"
समाजका हरेक वर्गलाई प्रतिनिधित्व गराउने यो कदमले समुदायमा सकारात्मक सन्देश प्रवाह गरेको छ। स्थानीय बासिन्दाहरूले अध्यक्ष साहको यस निर्णयको प्रशंसा गरेका छन्। विशेष क्षमताका व्यक्तिहरूलाई अवसर प्रदान गर्ने र उनीहरूको योग्यता र क्षमता उजागर गर्न मद्दत गर्ने यो प्रयासले जहदा गाउँपालिकालाई समावेशी र प्रगतिशील बनाउन महत्वपूर्ण योगदान दिने अपेक्षा गरिएको छ।
