राष्ट्रिय फुटबल टिमको सहायक प्रशिक्षकमा नरेश थापा नियुक्त भएका छन् ।
>
मंगलबार अखिल नेपाल फुटबल संघ (एन्फा) ले थापालाई पाकिस्तानविरुद्धको मैत्रीपूर्ण अन्तर्राष्ट्रिय खेलको लागि सहायक प्रशिक्षकमा नियुक्त गरेको हो ।
>
एन्फाका अध्यक्ष पंकजविक्रम नेम्वाङले सहायक प्रशिक्षक भएका थापालाई नियुक्ति पत्र दिएका छन् । नेपालले दशरथ रंगशालामा कात्तिक ३० मा पाकिस्तानसँग मैत्रीपूर्ण खेल खेल्दैछ । खेल साँझ ५ बजे सुरु हुनेछ ।
>
यसअघि यो मैत्रीपूर्ण खेलका लागि एन्फाले कार्यवाहक मुख्य प्रशिक्षकका रूपमा प्रवेश कटुवाललाई नियुक्त गरिसकेको छ । कटुवालले मछिन्द्र फुटबल क्लबलाई ए डिभिजन लिगको उपाधि जिताएका थिए ।
>
विश्व फुटबल महासंघ (फिफा) को निलम्बन फुकुवासँगै पाकिस्तान सिनियर पुरुष टिमले आठ वर्षपछि पहिलो अन्तर्राष्ट्रिय मैत्रीपूर्ण खेल खेल्न लागेको हो ।
>>