शिखर धवन नेपाल प्रिमियर लिग (एनपीएल) को पहिलो संस्करण खेल्न आउने सबैभन्दा ठूला स्टार खेलाडी हुन् । आईसीसी च्याम्पियन्स ट्रफी, एसिया कप र आईपीएल जितसकेका ‘गब्बर’ उपनामले परिचित धवनले कर्णाली याक्सबाट एनपीएल खेल्ने छन् ।
विश्व क्रिकेटकै पावर हाउस छिमेकी भारतका भेट्रान ब्याटरलाई कर्णालीले अनुबन्ध गरेपछि अहिले एनपीएलको चर्चा ह्वात्तै बढेको छ । भारतीय क्रिकेट समर्थक देखि भारतीय मिडिया पनि धवन एनपीएल आउने खबरले निकै उत्सहित छन् । यसले एनपीएलको चर्चा नेपालमा मात्र नभएर छिमेकी भारतमा समेत निकै चुलिएको छ । विश्वकै चर्चित र ग्ल्यामरस फ्रेन्चाइज लिग आईपीएलमा दोस्रो सर्वाधिक रन बनाउने अनि आइपीएलमा लगातार दुई शतक हान्ने पहिलो खेलाडी धवनको चर्चा भारतमा धेरै छ ।
त्यसैले नेपालमा रहेका धवन र भारतीय क्रिकेटका फ्यानहरु पनि धवन आउने खबरले उत्सहित छन् । विश्व क्रिकेटमा यति धेरै चर्चा पाइसकेको खेलाडी नेपाल मा लिग खेल्न आउने खबरले अहिले फ्रेन्चाइज टोली, नेपाली क्रिकेटर, नेपाली समर्थकदेखि सबै जना उत्सहित छ ।
