सप्तकोशीमा पानीको बहाव घट्न थालेपछि कोशी ब्यारेजमा हलुका सवारी साधनहरूको सञ्चालन पुनः सुरु गरिएको छ। शनिबार दिउँसो ४ बजेदेखि बन्द गरिएको आवागमन आइतबार दिउँसोदेखि साइकल, मोटरसाइकल, र अत्यावश्यक सेवाका साधनहरूका लागि खुला गरिएको हो।
आज बिहान साढे ६ लाख ६१ हजार ५ क्युसेक मापन गरिएको पानीको बहाव दिउँसोसम्म आइपुग्दा करिब आधाले घटेको छ। यसै कारण ब्यारेजको पुलबाट सम्पूर्ण सवारी आवागमन पुनः सञ्चालन गर्ने तयारी भइरहेको जिल्ला प्रशासन कार्यालय सुनसरीले जानकारी दिएको छ।
सुनसरीका प्रमुख जिल्ला अधिकारी रामचन्द्र तिवारीका अनुसार, पानीको बहाव आधा घटेपछि केही समयमै कोशी ब्यारेजको पुलबाट सबै प्रकारका सवारी साधनको आवतजावत खोल्ने तयारी गरिएको छ।
यसअघि, सप्तकोशीमा पानीको उच्च बहावले खतराको सङ्केत पार गरिसकेकाले शनिबार दिउँसोदेखि यातायातका साधनहरूको सञ्चालनमा रोक लगाइएको थियो।
