सेशेल्सले भारतका प्रधानमन्त्री नरेन्द्र मोदीलाई आफ्नो देशको सर्वोच्च नागरिक सम्मान ‘गार्डियन अफ द ब्लु होराइजन’ प्रदान गरेको छ। प्रधानमन्त्री मोदी हाल सेशेल्सको तीनदिने औपचारिक भ्रमणमा रहेका छन्।
सेशेल्सका राष्ट्रपति डा. प्याट्रिक हर्मिनीसँगको संयुक्त पत्रकार सम्मेलनका क्रममा प्रधानमन्त्री मोदीले उक्त सम्मान प्राप्त हुनु आफ्नो व्यक्तिगत उपलब्धि मात्र नभई भारतका १४० करोड नागरिकका लागि पनि गर्व र खुसीको विषय भएको बताए।
सम्मान ग्रहण गर्दै प्रधानमन्त्री मोदीले आफूले यो सम्मान विनम्रतापूर्वक स्वीकार गरेको उल्लेख गर्दै जलवायु परिवर्तनको चुनौतीसँग जुधिरहेका तथा भावी पुस्ताको हितका लागि वातावरण संरक्षणलाई प्राथमिकता दिएका सबै राष्ट्रहरूलाई समर्पण गरेको बताए।
उनले भने, “यो सम्मानलाई म जलवायु परिवर्तनविरुद्ध संघर्ष गरिरहेका र वातावरण संरक्षणलाई आफ्नो दायित्वका रूपमा लिएका सम्पूर्ण देशहरूलाई समर्पित गर्दछु।”
यस अवसरमा सेशेल्सका राष्ट्रपति डा. प्याट्रिक हर्मिनीले प्रधानमन्त्री मोदीलाई ‘गार्डियन अफ द ब्लु होराइजन’ सम्मान प्रदान गर्न पाउँदा आफूलाई गौरव महसुस भएको बताए। उनले यो सम्मान अन्तर्राष्ट्रिय व्यक्तित्वहरूलाई प्रदान गरिने सेशेल्स गणराज्यको सर्वोच्च नागरिक सम्मान रहेको उल्लेख गर्दै भारतका प्रधानमन्त्रीप्रति सेशेल्सको गहिरो सम्मान र कृतज्ञताको प्रतीक भएको बताए।
संयुक्त पत्रकार सम्मेलनमा प्रधानमन्त्री मोदीले आफ्नो भ्रमण सेशेल्सका लागि ऐतिहासिक समयमा भइरहेको उल्लेख गरे। उनका अनुसार यस वर्ष सेशेल्सले स्वतन्त्रताको ५०औँ वर्ष मनाइरहेको छ भने भारत–सेशेल्सबीच कूटनीतिक सम्बन्ध स्थापना भएको पनि ५० वर्ष पूरा भएको छ।
प्रधानमन्त्री मोदीले हिन्द महासागरले शताब्दीयौँदेखि भारत र सेशेल्सबीचको सम्बन्धलाई सुदृढ बनाउँदै आएको बताए। उनले हिन्द महासागरका माध्यमबाट व्यापार, संस्कृति तथा दुई देशका जनताबीचको आपसी सम्बन्ध निरन्तर विस्तार हुँदै आएको उल्लेख गरे।
उनले भारत र सेशेल्सले आर्थिक सहकार्य, डिजिटल प्रविधिको विकास तथा आपसी सम्पर्क विस्तारका क्षेत्रमा मिलेर काम गर्ने सहमति भएको जानकारी दिए। साथै, हिन्द महासागर क्षेत्रमा साझा सुरक्षा, स्थायित्व र समृद्धिलाई थप सुदृढ बनाउने प्रतिबद्धता दुवै देशले पुनः दोहोर्याएको उनले बताए।
